Noticies de Llangres // FOLK MUSIC FROM ASTURIES

El próximu vienres 17 d'agostu cellebrarse nel prau El Llanu de Campu Casu la V Nueche Celta , colos grupos: XERA, LLANGRES y BRIGANTYA. Los conciertos entamen a les 22:00 y tará disponible una zona d'acampada.

La nueche de San Xuan ye de xuru el día del añu con más conciertos folk en toa Asturies. Esti añu invitamosvos a la foguera de Pola Llaviana, onde Llangres actuará xunto col grupu Lliberdón.

Estos dies el grupu Felpeyu emitió un manifiestu nel que falen de los llamentables fechos ocurríos na pasada Nueche de San Xuan de Corvera y que derivaron nel triste accidente conocío por toos. Pedimos a to´l mundu que llea esti manifiestu pa que la xente entienda lo que tenemos que aguantar los músicos munches vegaes (más de las que quisieremos) y l'actitú de dellos personaxes que ven a los músicos como monos de feria y nun como trabayaores. El menifiestu ye' l siguiente:

Felpeyu denuncia l’actitú del conceyal corverán Luis Solares pola desastrosa organización del conciertu de San Xuan de 2006

Felpeyu quier denunciar el funcionamientu internu desastrosu del Ayuntamientu de Corvera, en particular na so estaya musical, personalizándolo nel señor Conceyal de Cultura Luis Solares. Como se podrá ver darréu, esti personaxe amosó una actitú d’incompetencia y prepotencia pa col grupu Felpeyu, siendo’l responsable caberu d’una nueche folk con una organización penosa, arriendes de negase a pagar a fecha de güei’l caché del grupu.

Na primera selmana del mes de mayu de 2006 un téunicu del Ayuntamientu de Corvera púnxose en contautu col grupu Felpeyu pa cerrar una actuación nel pantanu de Tresona con ocasión de la nueche de San Xuan de 2006. Felpeyu tomó nota d’esi compromisu verbal y refugaron otros conciertos que-yos ufiertaron pa esi mesmu día. Yá nel mes de xunu, el grupu vuelve falar por teléfonu con esi téunicu y, curiosamente, el conciertu yá nun se da por seguru: tán a la espera de saber si ta incluyíu nos conciertos de la llamada “Agenda musical”, pagaos pola alministración del Principáu d’Asturies al traviés de l’axencia Horus.

El malestar ye evidente y xustificáu; Felpeyu nun sólo perdió conciertos pa esi día, que ye lo de menos, sinón que tien que tocar al día siguiente en Calaf (Barcelona), y nun paecía normal tar pendientes de la poca formalidá de la organización de la fiesta de Corvera xusto enantes de salir a un viaxe en furgoneta de 11 hores.

Siguen trés conversaciones telefóniques en trés díes consecutivos ente Diego, gaiteru del grupu, y el téunicu, de nome “Tito”. Dos díes enantes del conciertu Tito decídese y confirma que sí se toca, anque nun haya subvención; paga l’ayuntamientu. Eso sí, Felpeyu tien que tocar “a les cuatro o cinco la mañana” porque'l conceyal Luis Solares “quier música hasta que seya de día”. A Felpeyu abúlta-y un horariu draconianu pa salir de viaxe depués. El resto de grupos que toquen esa nueche (Bandina la Curuxa, DRD y At First Light) tán contrataos pola empresa uvieina Actos Producciones. Marcos Valles, responsable de la mesma, niégase a cambiar l’orde pa que Felpeyu pueda tocar primero; l’argumentu ye que les estrelles (los susodichos “At First Light”) “son les estrelles y toquen a les doce”. Lo lóxico yera negase a tocar, pero daquella Diego Pangua yera miembru de DRD y la furgoneta que diba llevar a Felpeyu a Cataluña tenía qu’esperalu de toes maneres.

A la fin llegóse a un compromisu:

-A les cuatro de la madrugada'l grupu tien que tar tocando. Non probando nin a puntu de salir: tocando.

A eso de les 3:00 los felpeyos tán viendo l'actuación del grupu anterior, DRD. De sópitu, falla la electricidá: un desconocíu roba la llave del xenerador y escapa corriendo. Nun había personal de seguridá nin valles de protección del xenerador nuna fiesta con decenes de miles d’asistentes. Apaez Tito, que confirma que DRD terminó por esa nueche. Falta saber si va poder tocar Felpeyu.

A partir d’esti momentu la cronoloxía ye :

• 03:30: Hai que dir por otra llave al Berrón.
• 03:45: Los felpeyos, aburríos, toquen nel escenariu pa calentar los instrumentos y pasar el tiempu.

• 04:05: Llega la llave. Nun funciona. Hai que dir por otra al polígonu de Villa-Riaño.

• 04:15: Yá nun queda públicu.
• 04:20 Hai que colar pa Barcelona, porque incluso si la llave llegara habría que probar, y pondríamonos a tocar a les cinco y picu. Amás, les cuñes de monitoraxe yá tán retiraes.

Tito infórmanos de que si nun tocamos, el conceyal Solares nun va a querer pagamos, a pesar del compromisu verbal. La solución puede ser tocar n’acústico. La propuesta ye absurda, nun prau enorme y desiertu a les cuatro y media la mañana. Felpeyu cumplió'l tratu abondo, y garra la furgoneta a les 04:55, tovía ensin traza de que pueda retomase’l conciertu depués de dos hores y pico dende’l parón de DRD.

Nel trescursu del viaxe, un accidente causa la muerte de Carlos Redondo Bajo y d’Ígor Medio Tuya.

En díes y selmanes posteriores, nun tenemos noticia de naide del ayuntamientu de Corvera. A mediaos d’agosto, más o menos, el miembru del grupu Diego Pangua ponse en contacto con Solares, que presume de que “yo decido aquí quién cobra y quién no”, porque “si no tocasteis, cómo os vamos a pagar”. De toes formes, acepta encargar un informe a Tito y llamar a Diego Pangua nos siguientes díes. Pasa un mes. Solares esquiva automáticamente les llamaes de Diego, hasta qu’un día la telefonista del consistoriu ta atendiéndolu xusto cuando Solares pasa delantre d’ella, y él nun puede refugar garrar el teléfonu. Luis Solares: “Bueno, chaval, ya decidiré si os pago. No, todavía no hay informe”.

Finalmente, Diego preséntase en Les Vegues pa falar con Tito. Tito confiesa que sí entregó un informe al conceyal, selmanes enantes, aclarando que Felpeyu cumplió dafechu’l contratu verbal existente. Luis Solares suxirió cambiar los datos del informe pan nun tener que pagar. Al ser recrimináu por ello telefónicamente, recuerda que “yo soy Luis Solares, respetado tanto en la derecha como en la izquierda por ser inflexible en mi palabra, y vosotros no vais a cobrar”.

Ye triste ver como esta actitú contrasta, por exemplu, cola del Festival de músiques d’arrel de Calaf (Barcelona), onde Felpeyu tenía que tocar al día siguiente de la horrible nueche del 23 de xunu. Evidentemente, el conciertu nun pudo celebrase, pero la organización del mesmu abonó igualmente’l caché del grupu, amás d’interesase vívamente pol estáu de los felpeyos y les sos families.

Felpeyu pretende facer pública esta historia como denuncia d’un comportamientu llonxe del que se tien que tener con persones que tán trabayando, amás dexar polos suelos la imaxe del conceyu de Corvera que nun merez dirixentes d’esti tipu. Poro, queremos que se sepa quien ye Luis Solares, candidatu a l'alcaldía pol PP nes elecciones d’esti mes de mayu de 2007, del que la carrera política esperamos que quede a l'altura de la so talla personal.

En Xixón a 14 de Mayo de 2007

A. C. Felpeyu

Confirmose finalmente la presencia de Llangres nel festival Etnosur 2007 que cellebrarase en Alcalá la Real (Jaen) durante los díes 20, 21 y 22 de xunetu. Un adelantu de la programación pue consultase nel sitiu www.etnosur.com. El día de l'actuación de Llangres inda nun ta fixu, pero publicarase na nuesa web cuando se conozca.

Yá van saliendo los primeros conciertos pa esti añu 2007. De momento hai dos confirmaos en Valencia y en Madrid, que podéis consultar na sección de Conciertos. Amás ye probable que nes prósimes feches se confirmen otres actuaciones en Cádiz, Mallorca y Francia. D’otru llau, comentar que llevamos yá tiempu trabayando nel que va ser el tercer CD del grupu y que tamos enfotaos en entamar cola grabación enseguida (ye probable qu’en pasando’l branu)

Ya tenemos más información sobre'l conciertu de Llangres en Madrid. Será el sábadu 25 de payares na sala Valle Inclán del Círculo de Bellas Artes de Madrid (C/Alcalá 42). Llangres actuará al rodiu les 23:00 hores, aunque el conciertu entamará a les 22:00 con la actuación del grupu de Castilla y Lleon "Free Folk". Esti conciertu pertenez al ciclu "Creación Injuve 2006".

Esti martes día 31 Llangres actuará nel Teatru Filarmónica d'Uviéu dentro del ciclu de conciertos de la Axenda Musical del Principau. El concierto entama a les 20:30 hores y la entrada ye de baldre.